2014年最後一天，決定了要與女朋友們食素，一來早前聖誕節時大家都大魚大肉得太緊要，二來最近食得green風氣都愈來愈盛行，所以選擇呢間位於北角的素食·分子 InnoVeggie一試！本來對呢間餐廳都頗有期望，但食完後其實覺得有點名過期實，由食物到服務其實都只是一般水準，或者係我期望太高吧！
旅行‧最重要的小事Facebook Page︰
提早幾日Book了7:30，一行7人有幾位朋友先到達，已先入座。雖然當天的除夕夜，但座位安排其實都好有問題。7位女士，店方安排一張較闊的4人枱，再係頭尾加2張椅子。其實如果冇BOOK枱你俾我咁樣的坐法是可以接受的，但我已提早BOOK枱，這方面的安排係咪可以好少少呢？
首先點了個中西泰配4人套餐 ($688)，食住先之後再散叫。
【素海皇金菇豆腐羹】好味度︰ ❤ ❤ ❤❤ (5 ❤為滿分)
入口清爽，用上豆腐、金菇、素蝦等食材，味道不俗。
【黑松露野菌蘭花鍋】好味度︰ ❤ ❤ ❤❤ (5 ❤為滿分)
此菜式味道不俗，如果鍾意菇類嘅朋友應該會相當滿意。不過食唔到黑松露味，黑色點點似黑椒多啲！
【招牌脆米炒飯】好味度︰ ❤ ❤ ❤ (5 ❤為滿分)
其實真係唔明，點解個飯會係上咗1個湯1個菜後就上，不過唔緊要啦，呢個招牌脆米炒飯味道好ok，飯炒得乾身，而且脆米頗多，食得滿足。
【香葉辣椒炒素肉碎生菜包】好味度︰ ❤ ❤ (5 ❤為滿分)
用來炒素肉碎的醬汁味道怪怪，似是用了過咸魚露來炒，雖有生菜但都溝淡唔到陣味，絕非泰菜會食到的味道。
【香草茄醬素雞意大利瓜】好味度︰ ❤ ❤❤ (5 ❤為滿分)
本身自己鍾意食素雞，茄醬配上意大利瓜味道清爽，不過味道就偏酸，再甜小小就正。
【金柚沙律】好味度︰ ❤ (5 ❤為滿分)
朋友另點的金柚沙律，同樣是用了過咸的魚露，難以入口，而且沙律不是應該最先上的嗎？(與4人餐同時落單)
【招牌拼盤】好味度︰ ❤❤ (5 ❤為滿分)
本應是最先上的拼盤要三催四請先在甜品到前上枱，其實好明顯係漏單，而拼盤其實是照單就執入盤面非要好多工序來即煮的菜式，唔明白點解可以咁。
講到味道，豆腐夠滑，加上麻醬好配合；紅菜頭本身非我好之選；冇試到皮蛋；而右上的滷水豆腐似台灣餐廳的口味。
【籠仔黑松露蘑菇包】好味度︰ ❤❤❤❤❤ (5 ❤為滿分)
整餐最好味一道菜，蘑菇賣相好可愛，入口包好軟彈，裡面包住的黑松露蘑菇好香口，又夠多汁，熱辣辣入口好滿足，呢個值得一讚！
【紫薯貝殼粉】好味度︰ ❤❤ (5 ❤為滿分)
紫薯唔甜，配芝士焗味道唔夾。
【芝士豆腐多士】好味度︰ ❤❤❤❤ (5 ❤為滿分)
芝士香口，豆腐滑溜，多士焗得夠脆。
【芝士焗菜】好味度︰ ❤❤ (5 ❤為滿分)
兩心係俾後面個沙律的，芝士焗菜中間有茄醬，與椰菜不太match，味道偏酸。
【椰汁千層糕 】變【Tiramisu】 好味度︰ ❤❤ (5 ❤為滿分)
本身跟餐的椰汁千層糕冇哂，問都冇問過我地要唔要Tiramisu就放低走人，吹到啤一聲。Tiramisu酒味偏濃，但蛋糕底唔夠濕，而且整體偏甜。
成餐飯埋單$960
可改善位︰
1.座位安排
2.上菜速度 (雖然之後有個部長嘅人物出現叫大家多多包涵，不過其實應該唔係餐廳第1次做大節日，令人好失望，連試佢既分子雪糕既mood都冇啦。)
沒有留言:
張貼留言