【旅遊nobody】做乞兒好搵過街頭賣藝？

工作假期大熱，十個30歲以下青年，幾乎十個都話想去工作假期。無他的，趁年輕在異國打工賺旅費，邊個唔想？Yoyo Wing 都係其中一人，不過與別不同的，是他揀選用搖搖表演作為搵食工具，在澳洲街頭拋搖搖，灑熱血！

Text︰Viviy   Photo:由受訪者提供

收入比乞兒還要低

去 Working Holiday ，無非都是想在短期內賺一筆旅費，然後去各地觀光吃喝玩樂，估唔到作為一個賣藝者，時薪分分鐘比乞丐還要低！「澳洲最低工資是每小時AUD$15，玩搖搖平均只有 AUD$7 - 10 的時薪！有一次我更在悉尼見到一名乞丐在車站向候車人士討錢，竟有人給了他 AUD$20！」這 AUD$20，等於Yoyo Wing 賣藝兩小時的打賞，自然令他心裡不是味兒。

剛開始打算去工作假期時，Yoyo Wing 未想過以搖搖賣藝作為賺錢方法，直到在不同網上論壇上爬文後，見到有人提起過扭汽球可以維生，靈機一動決定以自己玩了10幾年的搖搖來賣藝賺錢，更特意去學了扭汽球作兩手準備，即使去到澳洲找不到工作都可以維持生活。「澳洲的賣藝可分為三大種類——音樂、表演、售賣型。如扭汽球及音樂都可以賺取唔少嘅收入，搖搖表演是三類中收入最少的一種。我自己都試過一次扭汽球，本來只想免費派發兼同當地人影相，但一小時內竟然收到 AUD$30-40 ！」不過扭汽球這賺錢較多的賣藝方法，Yoyo Wing 沒有繼續下去。「如果我只是為了賺錢，在香港工作不就行了？我來澳洲，是為了做我想做的事啊！」

「你正正經經搵份工好過啦！」

堅持做自己喜歡的事，但人在異鄉，有時亦會遇上令人沮喪的事。Yoyo Wing 試過被人偷錢、又試過被人吐口水！「賣藝者通常有個捐款箱喺自己身前面，觀眾俾錢同拎錢都要彎腰伸身入箱內，動作其實一樣。而且你在表演當中，前方又有其他觀眾，一般被偷的也是散紙，多數都沒有追究。又試過有童黨扮冇帶銀包過來問我借錢搭巴士，我只是笑笑口就算，因為俾了一次就一定有第二次！」亦有人留下假銀紙，更寫上「Give you an advice, find a job!」，這些人見得多，最好的方法是一笑置之。「表演搖搖人工低冇所謂，亦有好多人會停低看表演，有人會拍掌；有啲人無咩錢，亦會同我傾偈，話俾我知佢曾經去過香港！亦有香港遊客經過會俾AUD$10，又請我飲咖啡！好大滿足感！」

除了街頭賣藝，Yoyo Wing 又試過到 Royal Show 打散工，幫補旅費！

難忘三年一遇沙塵暴

工作過後，當然要有快樂假期。 除了開恩茲外，Yoyo Wing 幾乎去勻了澳洲各大城市。最難忘的一次經歷，竟然是在一個遊客罕至的南澳小鎮Coober Pedy發生！

在那次2日1夜的旅程中，Yoyo Wing 和2位剛認識的朋友一齊上山睇日落，怎知遇上三年一遇的沙塵暴！「本來嗰日好好天，又熱又乾燥，在山上時見到遠方有大片黑雲，當時都不以為意，點知黑雲愈來愈近，而且個天又黑哂，當我們落到山腳時沙塵暴已殺到，好似香港八號風球咁！好彩山腳有間地底酒店，第一時間走入去避難！由於本身Coober Pedy遊客不多，在酒店等了半個鐘都冇人出來。好在後來有架送Pizza 貨車來到，我哋三個求咗司機好耐先肯車返我哋出市中心，而司機仲話我哋知，咁大嘅沙塵暴兩至三年先有一次！」

地底酒店，人影都冇隻！

]

除了沙塵暴， Yoyo Wing 又試過在 road trip 中炒車，好在冇人受傷。「原來意外發生的一刻，腦中係會一片空白！」

活出自己的工作假期

工作假期的苦與樂，去過的人最清楚。Yoyo Wing 在回港後開Blog講自己的經歷，決定分享自己的故事，以生命影響生命。「有時計劃唔夠變化快，去工作假期最緊要有自己的目標，唔好迷失。係異地唔係只有開心事，都會有迷失及孤獨嘅時候。我見過有啲人為咗逃避一啲野而去澳洲，去到又留喺 hostel 煲劇就無謂啦！大家成日係網上睇到嘅遊記都係人哋嘅故事，但唔係你。青春好短，如果覺得ok，就應該要去活出屬於自己嘅 working holiday。」

工作假期返來後的Yoyo Wing 改變了不少，亦勇於踏出自己的 comfort zone，更挑起了他的旅行癮！Yoyo Wing 來緊 6 月將會去台灣，7月到新加坡參加搖搖比賽，再順道一遊星馬泰。更計劃趁年輕日後到尼泊爾、印度、西藏背包遊，續寫自己的旅遊故事。