最重要的生活小事: 【澳航商務艙】被寵壞的機艙體驗

今年前半年 Viviy去了三次不同旅程，竟然咁啱三次都是 over-night flight，而三次的旅程都帶不同體驗，最令人印象深刻而且大讚的，要數5月剛剛飛澳洲昆士蘭的嗰轉嘅澳航(Qantas)之旅，來回兩程都皆被安排乘搭商務艙，貼心服務加埋舒適嘅機艙空間8個幾鐘的機程輕輕鬆鬆就過去，值得一提嘅係啱啱先喺四月新開張嘅澳航貴賓候機室，由踏入候機室開始已經感受到被寵壞的感覺！

旅行‧最重要的小事 Facebook Page:

https://www.facebook.com/viviy.travel

全港最大單一貴賓候機室

今次飛澳洲布里斯本的航班QF98起飛時間為晚上8:45，因為當天還要返工的關係，所以預定早小小5點來鐘到機場，於貴賓候機室沖個涼之餘，又可以慢慢歎個晚餐先上機！

香港 > 澳洲布里斯本：

5點來鐘到達香港機場，Qantas 嘅 Check-in counter 設於 J 區，而商務艙更特設 check-in counter，不用排長龍。同時商務艙的寄艙行李限額達40 kg之多，一定唔怕爆quota，回程帶多個喼都得！

新開張的澳航貴賓候機室開張兩個多月，是整個機場內最大的單一貴賓候機室，用上幾百萬打造，當然要提早到機場好好體驗一下！圖中 Viviy 的後方特意貼上了香港夜景的牆紙，好有代表性！另外仲一邊貼有深水埗街景的牆紙，對香港人好有親切感，對即將要離港的旅客來說就是對香港的 last minute 回味！

講到明地方大，最多可以一次過容納到300個客人同時享用候機室，出發當天難得天氣於大雨後轉晴，可以睇到日落！

候機室設有大量座位，仲有一排單人「日落位」面對住閘口，睇住日落預先食住野等上機，就算自己一個人飛又有咩所謂呢？,而且後機室提供不少美酒美食選擇，唔少frequent flyer都會選擇先在lounge內食飽，上到機後爭取瞓覺時間，可以最佳狀態迎接到步後的schedule！

澳洲名廚 Neil Perry 坐鎮

澳航貴賓候機室特意請來澳洲名廚 Neil Perry 擔任顧問主廚，將其融合歷洲菜特色的澳洲菜帶到候機室，即使我未去過佢係澳洲嘅餐廳，單是在lounge內試到其菜式都覺得好正！

Lounge內的職員好細心，未食野前先送上特製 cocktail Chi Chi 打開味蕾，然後會為我推薦當晚食咩好，由於我們一行4人，每人點咗一份香烤澳洲盲鰽配茄子以及 Couscous，香口又不油膩，更可以配搭不同的紅白餐酒，當然食魚配上一杯 Riesling 白酒就更相得益彰啦。另外點一份叉燒飯，再加上仲有 buffet area嘅選擇，真係捧住個肚去上機！

嗱嗱嗱！無論你食到幾飽都好，呢個焦糖芝士蛋糕一定要試！又香又smooth，食到停唔到口。而且即場就有其他客人食過後即時向職員大讚，仲要問佢拎意見表來填寫添！

即是呢。。。如果有外賣的話，我想回程落機時買返個返屋企！

坐得 over-night 機，除了食飽先上機之外，可以舒舒服服沖返個涼上機就更好啦！澳航呢個 VIP lounge就有12間shower room，設施齊備又有 spa 品牌嘅 amenities。不過由於一日同時間可能有幾班機係差唔多時間起飛，shower room都有機會 full！咁嘅時候就可以搵 lounge內職員幫手留位，通常 5-10分鐘內就有房！

個lounge咁好 hea，真係唔到 last minutes 都唔願上機！

飛去布里斯本呢程 Viviy好幸運地被安排坐係 1A位置，本身已經好闊落嘅商務位就更見寬闊！一上機就會有空姐送上果汁或香檳，待飛機起飛穩定後，空姐就會為商務位的客人送上印有澳移袋鼠logo的棉質睡衣，同埋 Kate Spade 的 Amenities Kit！呢個咁靚的 kit set 內有眼罩、耳塞、護膚套裝以及機艙用襪子一對，不過Viviy最鍾意都係個袋，女士先有呢個咁靚嘅 Kate Spade 袋，男士的就換成以淨色為主，更加型格的Jack Spade袋。

講咗咁多，商務艙其中一個最重要角色就係大家坐緊張坐椅！與其話係坐椅，其實係一張床！只要大家按幾下坐椅手柄上的遙控制，呢個位就可以變成長達兩米嘅空中睡床，而且可以因應自己身型調較角度，夠舒服！

唔好講笑，其實商務艙內的 in-flight menu 都出自 Neil Perry 的手筆，晚餐我揀了意大利青瓜燒鯛魚配青豆餡餅和馬鈴薯蓉，加上時令沙律和生果，未到埗相信已經增加唔少卡路里。

享用完晚餐後空姐就會送上混合了蔡衣草以及洋甘菊的甜睡茶，同時將機艙燈光較暗俾乘客準備好好休息！大家亦陸續換上睡衣，較低坐位好好入眠。。。

瞓瞓下聞到咖啡香時就係機內早餐時間！未瞓醒而且小小時差的關係(大約香港時間凌晨3點幾），最好就食返個 yogurt 清一清，仲可以睇埋日出，真係。。。呢個咁爽皮的機艙＋貴賓室體驗真係俾澳航寵得好緊要！